حتتين على السريع

بعد السلام وأحلى الكلام

وبعد مادتين إمتحان

قلت أسلم عليكم بشوية كلام

:

(1)

ليلة إمتحان القرآن

كنت قد حفظت فى هذا اليوم سور الإسراء والحجر والكهف ويوسف و3 أرباع من آخر التوبة

يعنى تقدر تقول حفظت وراجعت فى بتاع يومين كده 3 أجزاء

شفت بقى

أى والله 3 أجزاء وبصراحة كانوا يومين زى العسل قرآن وبس والواحد كان كاره يسمع أى حاجة تانية غير القرآن

::

كنت حابب أوصلكم أد إيه القرآن جميل وفعلاً زى ماقال الرسول[صلى الله عليه وسلم]: (من أراد الدنيا فعليه بالقرآن ومن أراد الآخرة فعليه بالقرآن ومن أرادهما معاً فعليه بالقرآن).

كمان عاوز أقولكم إن الإنسان ممكن يعمل أى حاجة بس دا لو كان عاوز يعمل فعلاً

**********

(2)

حابب أعلق على موضوع الوفاة بتاع ابن ابن الريس

يصراحة كنت عاوز أقول كلام كتير لكن هاكتفى بكلمتين:

الملك دخل قصر الملك

الأولى بفتح اللام والثانية بكسرها

دمتم بخير وأشوفكم على خير إن شاء الله

:

وفى الختام عليكم السلام

واجب الوقت..

السلام عليكم

إلى القليلون الذين عرفوا المدونة وعرفونى عن طريقها



أسألكم الدعاء علشان الإنطحانات دخلت والصداع هايشتغل

ولسه هابدأ يوم الأحد مع إن فى جيران ليا خلصوا زى هايدى مثلاً وماتسألش مين هايدى وكمان مهند هايخلص يوم السبت وماتسألش مين مهند برضه



وواجب الوقت الان هو المذاكرة والمذاكرة وإن كان هناك شيئ آخر فهو المراجعة

أسألكم الدعاء وقبل ان أترككم أتمنى من الجميع أن يكتب لى بنصيحته حتى أعود..لكم خالص تحياتى...!

إمتحانات....وكله بتاع ربنا

سلامو عليكو

إمتحانات نهاية العام وإن شاء ربنا إمتحانات آخر عام فى أم التعليم اللى الواحد بيتعلمو غصب عنه وبالعافية..المهم خلونا فى الإمتحانات.

طبعاً الكلية اللى أنا فيها الترم فيها عبارة عن أسبوع أجازة ودا الأسبوع الأول وأسبوع تسخين ودا الأسبوع التانى وشهر نفخ فى المدرجات والمعامل ولو انت فى القسم اللى أنا فيه هيبقى النفخ فى الرحلات كمان..أما باقى الترم فهو عبارة عن إمتحانات فى إمتحانات والواحد بيوصل لدرجة متقدمة جداً من السوء ومابيصدق آخر الأسبوع ييجى علشان يروح البلد يقعد مع الحاج والحاجة ومحمود أخويا وألعب مع رقية بنت عمى..(وسمعنى سلام العائلة والناس ياعم الحاج)..لكن أحياناً أو بصراحة غالباً بيطلعلك واحد يقولك انا عوز الكشكول يتسلم يو السبت ولا هاعملكم إمتحان أعمال سنة مثلا وبصراحة بيبقى امتحان ولا له أى لزمة فى أى حاجة...يعنى مثلا الدكتور محمد فتحى اللى بيدينا العملى بتاع التحت سطحية وجيولوجيا البترول قال لنا بالنص الواحد:

إسمع يا بسبس إنت وهو السبت الجاى إمتحان واحفظو((..حاجات كتير ما تشغلش بالك..)) وبعد ماطلع عنينا فى محاولة حفظها وماحصلش نصيب ومعرفناش نحفظها كلها بدأ الإمتحان وقام سايب السكشن وخرج والحل ابتدى ياجدعان بالظبط زى اللى فى الصورة الجاية:

وبمناسبة الدكتور محمد فتحى فهو مخنق علينا على الآخر وفى أحد مرات التجلى والروقان التى نادراً ماتصاحبه قالى بالحرف الواحد أيضاً:

(والله يامشمش انت وهو ممكن تنجو فى جيولوجيا المياه أما البترول والتحت سطحية..بصراحة ماأوعدكوش ماشى يابسبس انت وهو..)

واحنا إمتحنا جيولوجيا المياه والحمد لله كانت تمام ويوم الثلاثاء الجاى هانتحن المادة التانية..إدعولنا..أصل الواحد خلاص بقى حاله صعب جداً ويصعب على الطلبة اللى فى خدمة إجتماعية

وإمتحنا كمان مادة المناجم وعلى رأى عمر صفوت:مناجم وحاجات بتهاجم واللى بيدنا النظرى بتاعها الدكتور أحمد سعد وما أدراكم مالدكتور أحمد سعد..دا عاوز بوست لوحد علشان نوصف فيه وفى شرحه الممتع وفى أسلوب تعامله الأمتع منه (طبعاً أنا بئلس) لكن ممكن أذكر موقف واحد:

فى أول محاضرة له داخل علينا وفى إيده العدة اللى هايشرح منها وبدون مقدمات ضحك ضكته المميزة جداً وقال هو كمان بالنص الواحد: إنتو كتير كده ليه؟..ضحكة بسيطة..لكن مش مهم زمايلكو بتوع السنة اللى فاتت كانو كتير برضه وسقطو..ضحكة أطول من اللى فاتت..وانت كمان هاتسقطو..الضحكة بدأت تبقى فظيعة..والله هاتسقطو..ثم ختم تلك الجملة اللعينة بضحكة مدوية دوت فى أرجاء مدرج 1 اللى تلت ترباعه لايصلح للإستخدام الطلابى..

نرجع بقى للمناجم: بعد ماخرجنا من الإمتحان تأكدنا إن إحنا كنا بنمتحن فعلاً حاجات بتهاجم زى ماقال عمر صفوت.. وكان الإمتحان فى سرعة إستخدام القلم فى الكتابة وسرعة النقر فوق الالة الحاسبة..وكان طوييييييييييييييييييييييييييييييييييييييييييييييييييييييييييييييييييل

-الدكتور محمود بتاع الجيوكيمياء العملى لما دخل بيراقب على سنة 3 قالهم راخر بالحرف الواحد:

(إتظبطو وكل واحد يبص فى ورقته أنا لسه مظبط زمايلكو اللى فى 4 (ياجدع اختشى..أصل أنا فى 4 ) وبعدين تجلى على الآخر وأطلق حتة دين رسالة تحذيرة بصوته العالى جداً: واللى بيته من إزاز مايقلعش فى الصالون..وإنطلقت معها الضحكات الساخرة من كل سنة 3 ...ياسلام على التظبيط يادكتور..

-بئولكو إيه إنا عندى إمتحانات أيام: السبت والأحد والأثنين والثلاثاء..كلو ورا بعضه والواحد مضغوط أكتر من العربية دى:

-لكن هناك سؤال محورى جداً: إنت ليه نازل تقعد على النت الوقت دا كله فى الضغطة السودة اللى انت فيها دى؟

وهنا تأتى الإجابة المحورية أيضاً: علشان دكتور المشروع نافخنا هو كمان وانا دلوقتى هاظبط فيه وقلت أسلم عليكو..وكمان المادة الجداية إن شاء الله سهلة..

..وفى الختام ..عليكم السلام..