الأحد، يونيو 28، 2009

فى الهايف يانننس


السلام عليكم

فى هذه المرة لم أمسك بالقلم لأكتب شيئ معين...ولكن لضيق وقع فى صدرى وهم الم بى...فممكن اللى هنا يبقى أى كلام....

وياعالم ممكن أكتب حاجة تنفع بلدى وساعتها هاتحتفل بيا الحكومة وترمينى فى السجن بأى تهمة وأتوقع إنها -أى التهمة- تكون بعنوان: من أين لك هذا؟؟
ودا لأن هذا اللى معايا عبارة عن خمستاشر جنيه وخمسة وأربعين قرش منهم 3 جنيه عملة معدنية و2 جنيه أرباع مخرومة..أو أى تهمة تانية..مش هاتفرق المهم إنهم يكافئونى على خدمة البلد..

--مثلاً ممكن فكرة مسابقة هايفة زى المفتش كرومبو مثلاً أو سرحان ونفيسة وساعتها بتوع القنوات الفاضيائية ينبسطوا بالفكرة ويشتروها.

--ممكن أكتب عن واحد صاحبى صفات حلوة وأقعد أتغزل فيه هو واللى جابوه ومش مشكلة لو أنا مخنوق منه...أهو الواحد حتى يستفاد علشان لما ربنا يكرم ونشتغل نعرف نتدرج فى السلم الوظيفى بصورة غير طبيعية وبدل مانطلع السلم درجة درجة نبقى نطلعه قلبة قلبة.

--ممكن اكتب رأيى الحقيقى عن رجل أعمال من إياهم أو شخصية من اللى بيقولوا عليه صاحبة مركز إجتماعى..وممكن رأيى دا ينشر فى أى جريدة معارضة من بتوع: تحيا مصر وتسقط حكومة مصر.حتى لو إن الراجل اللى كتبت عنه طلع جوز بنت عم إبن خال مرات أخو رئيس تحرير جريدة حكومية من بتوع: مصر أمنا والنفاق بيجرى فى دمنا..
ساعتها بقى هاتهزأ ويلبسونى تهمة سب وقذف وإلقاء تهم بدون دليل وأتحبس برضه بس المرة دى ممكن أطلع ضمن المفرج عنهم ممن شملهم أول قرار عفو رئاسى عن مساجين الرأى من السيد الرئيس الذى كان قبل دخولى السجن نجل الرئيس....
اما لو كان رأيى فى الراجل دا كويس فمن المؤكد أننى سأكون من القائمين على تجهيز الحفل الخاص بتنصيب السيد الرئيس""اللى هو كان نجل الرئيس"" رئيساً للبلاد.

--ممكن أكتب خاطرة عن آفات اللسان وألقيها فى المسجد اللى جنبنا بعد أى صلاة من الصلوات وساعة ماخلصها..يقوم الحاج الدمرانى عسكرية مجضوع على إيده الإتنين ويرفع كرشه فوق مستوى سطح الصدر ويقول"بتأثر": ياسسسسسلاااااااااام كلمة جميلة والله يابا الأستاذ بس على الله البهايم اللى سمعوها دول يستفادوا ""آفات اللسان بقى"".

واهو أى كلام والسلام...وعلى راى محمود عبد العزيز فى فيلم الكيف:
"إدينى فى الهايف وأنا أحبك يانننس"".

21 Comments:

جنّي said...

السلام عليكم

والله جميل كتبت وما كتبتش ...

المهم تكتب يا عمنا .. بس اتخلص من الربع جنيه المخروم احسن يلبسوك قضية انك انت اللي خرمت الرع جنيه ..

محاولة لكسر الصمت said...

يبدو أن (الهيافة) هي القاعدة هذه الأيام..

بنجاواتى said...

مش هايف ولا حاجة

بالعكس كلام واقعى

بس الواقع هو اللى بقى ساخر بشكل مبالغ فيه

تحياتى

ابو صهيب ( الجمعاوي الاصيل)سابقاً said...

ربنا يفرج همك

المتبهدلون في الأرض said...

أكتب كل اللي في نفسك خالص .. وبراحتك

وساعة لما نلاقي البوست اللي بعد ده ما نزلش ..حنفهم (سلملي على أخوك النايم)

أنــا said...

لو كل الشخابيط كدا !!!
شخبطه لزيزة فعلا ..
على رأي برنامج الصفحه الاخيرة .. دي حاجه تفقع ..
دنيا وعايشينها نقول ايه غير الحمد لله ؟

عجبني فكرك وطريقتك ..
بالتوفيق بجد

مشخبطاتي said...

المدون الفاضل/جنى..
وعليكم السلام..

شكراً على المداخلة الطيبة والحمد لله اهو الواحد بيكتب...والحمد لله اتخلصت من الربع جنيه إياه(خليها فى سرك) بس معايا دلوقتى 10 جنيه عملات معدنية مختلفة من أول الشلن لغاية الجنيه...ألا إيه رأى القانون فى حاجة زى دى من الحق؟

مشخبطاتي said...

محاولة لكسر الصمت..

شكراً على المرور ولكن لاأعتقد أنها قاعدة هى بس ملحوظة شوية ومنتشرة لأن للأسف الناس هى اللى ساعدت الهايفين على كده..

مشخبطاتي said...

المدون الفاضل/بنجاواتى..

عندك حق هو واقع وموجود بس المهم ماننجرفش فيه..!!

شكراً لمرورك.

مشخبطاتي said...

المدون/أبو صهيب..

جزاكم الله خيراً..ومزيداً من التفوق.

مشخبطاتي said...

عم المتبهدلين منور ياحاج..

وماتقلقش أنا لسه ماعملتش حاجة تنفع البلد وكمان ما قلتش رأيى فى رجل الأعمال إياه..

آه من الحق..مش هاعرف أسلم لك على أخويا لأنه نايم دلوقتى..!!

مشخبطاتي said...

انا أو أنتى زى ماتحبى..

شكراً على مرورك وتعليقك الطيب..

وعلى رأيك الحمد لله..

بنت الاسلام said...

اقعد ساكت احسن

احسن بيحاسبوا الناس علي الشخابيط اليومين دول

تحياتي

مشخبطاتي said...

الأخت الفاضلة/ بنت الإسلام..

اتكلمى واوعى تبطلى كلام ماهو دا اللى احنا عارفين نعمله دلوقتى فنلحق ناخد راحتنا قبل مايمسكونا..

شكراً لزيارتك.

وحي القلم said...

السلام عليكم

إذا كانت هذه هيافة فمرحبا بالهيافة

----------

الموضوع اللي كتبته ليه بعدين
الأول
ان ازماتنا دي ليها حل
وكان بعود الثقاب اللي اترمى وولع البنزين
واشعل الطريق
يعني ثورة
والتاني
اجتماعي
وهو الظلمة اللي احنا عايشين فيها
حلها
اننا كلنا نتكاتف
ونضي العود في وقت واحد
عشان حياتنا تنور
شوف بسيطة ازاي ؟

تقبل مروري

saheda.com said...

النائب مشير المصري رئيس "الحملة الدولية للإفراج عن النواب المختطفين".. هل لكم أن تعطونا تعريفًا بالحملة التي ترأسونها؟

** بدايةً.. دعني أشكر "المركز الفلسطيني للإعلام" على اهتمامه الكبير بهذه القضية المهمة، ونحن نؤكد أنه مضى ثلاثة أعوام متواصلة على اختطاف نواب المجلس التشريعي الفلسطيني من قِبل الاحتلال الصهيوني أمام مرأى العالم ومسمعه، وهذا شكَّل سابقة خطيرة وجريمة سياسية وانتهاكًا صارخًا لمبادئ القانون واتفاقية "جنيف" الرابعة، ناهيك عن تجاوز الاحتلال قواعد الديمقراطية وأسس احترام إرادة الشعوب.

وإن الاحتلال الصهيوني يصر حتى الآن على انتهاك كرامة الديمقراطية بل ومحاكمتها من خلال استمراره في اختطاف النواب وتقديمهم إلى المحاكمات، والإمعان في ذلك بتمديد محكومياتهم غير الشرعية بعد انتهائها؛ بغية تغييبهم خلف قضبان السجون طيلة الدورة الانتخابية.

ومن منطلق رفضنا القاطع لاختطاف النواب ومحاكمتهم، واللذين شكلا محاكمة للديمقراطية واختطافًا لنتائجها، وإدراكًا منا أن مكان هؤلاء النواب المختطفين ليس في أقبية السجون ولكن في مواقعهم البرلمانية التي اختارهم لها الشعب الفلسطيني عبر صناديق الاقتراع واستمرارًا للجهود التي بذلت دفاعًا عن هذه القضية، وتوحيدًا لطاقات البرلمانيين والأحرار في العالم وصولاً إلى فجر حرية النواب المختطفين.. فقد قرَّرنا إطلاق "الحملة الدولية للإفراج عن النواب المختطفين".

ونحن في "الحملة الدولية للإفراج عن النواب المختطفين" نؤكد رفضنا القاطع للقرصنة الصهيونية والتدخل الفظ في الشأن الداخلي الفلسطيني ومحاولات تغيير الخارطة السياسية الفلسطينية عبر اختطاف النواب ونسف الخيار الديمقراطي، ونطالب بضرورة تحرك المجتمع الدولي لحماية القيم الإنسانية والأخلاق الديمقراطية ومواجهة الانتهاكات الصهيونية للأعراف والمواثيق الدولية، كما ندعو البرلمانيين في العالم وكل الأحرار إلى الانضمام إلى هذه "الحملة الدولية للإفراج عن النواب المختطفين" وتحمُّل مسؤولياتهم في الدفاع عن الديمقراطية، والعمل على تشكيل رأي عام عالمي ضاغط للإفراج عن النواب وتجريم هذه السياسة "الإسرائيلية" الخطيرة.

فشكووول said...

السلام عليكم صاحب الشخبطه

صحيح كدا كدا حتخش السجن من ابن السيد الرئيس اللى هوا الرئيس زى المثل اللى بيقول ( وكمان بتقولى نعم .. دب )

اول زياره لمدونتك واظنها مدونه رائعه
تحياتى

حلم بيعافر said...

كتبت مكتبتش
هى هى
ماكلنا بنكتب
ايه اللى بيحصل يعنى؟

مشخبطاتي said...

مصعب..

وعليكم السلام
شكراً لمرورك...

اما بالنسبة لأبعاد موضوعك فدماغى مارحتش لبعيد كده وأقابلك فى مدونتك..


تحياتى.

مشخبطاتي said...

أستاذ/فشكووول

وعليكم السلام ورحمة الله وبركاته

شكراً على الزيارة والكلام الحلو...

تحياتى.

مشخبطاتي said...

حلم بيعافر..

أختلف معك..طبعاً كتبت غير ماكتبتش

من فترة أنا كنت مابكتبش وانت أكيد كنت كده قبلى وغيرى وغيرك..فكل شوية اللى بيكتبوا بيزيدوا

أنا معاك إن كتابتهم ممكن ماتأثرش تأثير مباشر لكن على الأقل فى 2 أو 3 هايتأثروا وهايتغروا ويبدأوو يأثرو فى اللى حواليهم....وأهى سفينة وماشية.

تحياتى.

blogger templates | Make Money Online