السبت، يناير 23، 2010

يوميات عاطلـ..1

بسم الله


ها أنا أستقبل عامي الرابع والعشرين وأنا قابع في بيت أبي
**



في إحدى حوارات العواطلية وبالأخص مع إثنين من أعز الأصدقاء علمنا أن شركة بيكر للجاز-الشهرة بترول- أعلنت عن إختبارات وعلى السادة الراغبين أمثالي التوجه إلى مقر الشركة للقيام بهذه المهمة..وفعلاً تم الإتفاق بيني وبين أكثر من عاطل غيري[أحدنا كان معه واسطة]..ولأن شركات الجاز كلها قريبة من بعضها في الجوار فتم طبع أكثر من نسخة من السيرة الذاتية لتوزيعها بالمرة..!!


المهم أن العبد لله خرج من بيته باكراً بعد أداء صلاة الفجر ولكني لم أكن مستعداً لهذا اإختبار فلم أقرأ أيّ شيئ كما أني لم أستعد من حيث المظهر..[الشعر والبدلة وكل الكلام دا]


وعندما ذهبت إلى القاهرة..قابلت نصف الدفعة..ومنهم  اللي لابس بدلة ومنهم اللي زي حالاتي..ثم ذهبنا إلى الشركة..لكنهم قالوا وبكل بساطة: الإمتحان إتأجل لأجل غير مسمى..ممكن حضراتكم تسيبوا لنا الC.V..وح نطلعها الـ H.R (ماعرفش يعني ال إتش آر دي)..ولما نعوز ح نتصل بيكم إن شاء الله..


يعني من الآخر فوت علينا بكره ياسيد..ولأن الإمتحانات إتلغت..فزميلي اللي كان معاه واسطة..دخل إمتحن..!


من المؤكد أني إستفدت من المشوار..فقد أخذت خطوة جيدة
والدروس المستفاد من يوم العاطل الأول:
-مقابلة أكثر من عاطل مثلي..وتبادل طرق الإتصال حتى نعرف كل جديد في عالم الوظيفة
-توزيع الـ: C.V على شركات الجاز-اللي هي البترول ياعم- في منطقة المعادي
-معرفة الأسئلة التي تأتي في إمتحانات تلك الشركات
-من أهم الدروس أيضاً..أنه لا وجود للواسطة في التعيين
-أرض الواقع غير القبوع في بيت أبي
[ حلوة القبوع دي :) ]




15 Comments:

عبيدة الرحمن said...

والله مش حضرتك بس اللى وصلت للـ24 وبيحصل معاك كده
والله الدنيا كله كده
ربنا هو المعييين

نِـبْراس~ said...

السـلام عليكم
/
لا تيـأس , فعليك الصـبر مع الإصـرار والعزيمـة , ومحاولة السـعى وراء كل فرصـة , فالطريـق مازال أمامك .
وفقك الله ويسر لك الخير حيث كان

راجية الرحمه said...

حلوه فعلا القبوع دى
المهم بس حضرتك متفقدش الامل

"قلـــ بـــــلال ـــــب فارس" said...

ياعمى الجميع فى الهواء سواء
بس الانا اعرفه كل الناس شغاله تعرف فين على المصلطب هههههههههه
يلا سلام بس لا تياس اشتغل اى شى والله البنا البنا بيتنا كانت واخد بكالرويس تربية ويوجد كتير من امثاله من ييسيقون طفطف فى الشارع
سلااام

-_- said...

مايكل ( عميد الباحثين عن عمل ) لقى شغل .. انت مش هتلاقي ؟؟

مشخبطاتي said...

عبيدة الرحمن..

فعلاً مش لوحدي اللي قاعد..أعرف كتير قاعدين..لكن الحمد لله انا عاطل عن الوظيفة..بس مش طول النهار قابع في البيت..أحيانا بكون قابع في أماكن تانية...

مشخبطاتي said...

~نِبْراس..
وعليكم السلام والرحمة..

إن شاء الله لايوجد يأس فالأرزاق مقدرة من قبل أن نأتي إلى الدنيا..فالبحث مع الصبر والإصرار كما قلتم سيصل بنا في النهاية إلى مانريد..!

مشخبطاتي said...

راجية الرحمة..

الحمد لله ‘ن في حاجة عند العواطلية حلوة..
وإن شاء الله الأمل موجود طول ماربنا سبحانه وتعالى متواجد..

مشخبطاتي said...

بلال..

ياستير يارب..إيه الفال الحلو دا يا أخي اللي انت داخل بيه..طيب قول أعرف مدرس اشتغل مدير مدرسة على طول..او واحد معاه بكالوريس واشتغل سواق طيارة..

الواحد مايعرفش يتكلم شوية..:)

نورتني ياجميل :)

مشخبطاتي said...

شارم باشا..

أيوه كدا هي دي السيرة الحلوة..عميد الباحثين اشتغل..
شفت ياعم بلال :)


تصدق إني أول ماشفت إسم مايكل افتكرت مايكل زميلي..أصله قابع هو كمان زي حالاتي..!
لكن قبوعه أكتر من قبوعي لأني وزعت ورقي على شركات الجاز وكلمت ناس في شركات الإنشاءات الهندسية..لكن مايكل بقالي سنة ببوس في إيده علشان يعمل السي في ومكسل..!!

عبيدة الرحمن said...

http://nafezate.blogspot.com/

عبيدة الرحمن said...

http://nafezate.blogspot.com/

اعشق فى الليل ضوء القمر said...

بس كلنا هذا الرجل دعم نفسك جامد باللغه
و البرامج
كويس جدا
وخد فيها كرسات وبما ان ليك مدونه يعنى عندك نت و ده متوفر على النت فى اسطوانات تعليميه كثير ودور على اى وظيفه فى تخصصك مش لازم شركات البترول فى المعادى
ربنا يرزقك اسعى انت بس وهتلاقى ان شاء الله

مشخبطاتي said...

اللغة والبرامج..

غالباً دي اليوميات اللي جاية إن شاء الله..

سيبك من البترول..انت منورني والله :)

جمعاوى said...

24


بس ..!!

blogger templates | Make Money Online