الاثنين، فبراير 22، 2010

يوميات عاطل...2

سلامو عليكو

ومازلتُ قابعاً في بيت أبويا الحج ..!
أي والله لسه قابع..لاجديد في حياتي فأمسي مثل يومي وإن شاء الله بركه ح يبقى زي النهاردة..بس انا إحتمال أحلق شعري بكره !!

كل ما أتيح لي من شغل عبارة عن مندوب دعاية..الشغلانة دي متوفرة بالعبيط..!
أول مرة بعد التخرج على طول..وكنت طالع فرحان وبضحك للدنيا وبرسم في الأحلام..طلعت الدنيا كوابيس !!

المهم..أول شغلانة كانت عن طريق أبويا في شركة مستلزمات طبية يعني تجهيز مستشفيات وعيادات وكل الكلام ده..الراجل اللي كنت المفروض رايح عليه يعطيني موعد ويخلفه مرتين ورا بعض والموعد من لسانه فاتخنئت منه يعني من الآخر بيوزعني ..!!

بعد كده سكة الجيش..يعني مصر هي أمي وليبيا هي خالتي..والحمد لله أخدت التأجيل من الخدمة العسكرية وبصراحة العملية مش ناقصة أصلها مستكفية ع الآخر !!
واللي يشوفني وأنا فرحان يقول أنا ح أشتغل تاني يوم بالنهار وأروح أخطب العروسة باليل وأتجوز آخر الأسبوع..لكن بعد كده طلع الموضوع كبير (كبير أوي) وإن شاء الله أكلمكم عن موضوع الخطوبة والجواز بعدين :)

ثم جاءت الفرصة الثانية..برضه مندوب دعاية..بس المرة دي في شركة أدوية وبصراحة دي أكتر شغلانة أكرهها في حياتي بسبب زمايلي اللي اشتغلوا فيها وكان حالهم صعب جداً..ناهيك إنك ممكن تتدبس في مرهم او كريم تدليك او أدوية تخسيس وحاجات تانية في منتهى قلة الأدب..يعني تخيلوا معايا كده وأنا داخل ع الدكتور من دول وانا زي الحيطة كده ومعايا حبوب تخسيس..إخص الله يكسفك يامصطفى(اللي هو أنا) دا إذا دخلت للدكتور أصلاً..يعني يمكن بعد مايلطعك نص ساعة بره تطلع بلاجديد..لأ وإيه ممكن تطلع بعد شوية من كرامتك تضيع..وساعتها ياحلو تروح تبص في المراية ح تلاقي نصك مش موجود ..!!

فأنا احترت بينها وبين إني أنمي نفسي وآخد دورات وكل الجو دا علشان لما تيجي شغلان في مجالي أكون جاهز..وفعلاً بسبب كرهي وبغضي الشديد للشغلانة أخذت دورة ICDL وخلصت الدورة...!!

لكن في أثناء الدورة عرضت عليا أخرى..برضه مندوب دعاية..لكن المرة دي حاجة مختلفة خالص..كانت مندوب هريسة وجلاش ! وكانت بـ: 350 ج في الشهر طبعاً المواصلات عليهم...وطبعاً رفضتها لأن حسيت إني بينضحك عليا إزاي هريسة وحاجة حلوة و350 جنيه..إيه الحلاوة اللي موجودة في الموضوع ...!!

اما أنا دلوقتي فحالتي النفسية زي الزفت..وممكن تكون أزفت من الزفت بزفتين تلاتة !!

فكها من عندك يارب !

15 Comments:

سمكه واحده said...

ربنا يفرج همك يارب
ويشيل عنك الحزن
مش كنت بتقولي نص الكوبايه الفاضي والمليان ومعرفش ايه
بص بقي للمليان وانسي الفاضي ده لو كان فيه مليان
(:
ربنا ييسرلك الحال

Zika said...

اول زياره
ونصيحه اكيد انت مش محتاجها
الدنيا دي عباره عن .. بطيخه :D
لو طلعت قرعه ماتزعلش كل اي حاجه تانيه

بس يعني ايه مندوب مبيعات لحلاوه وهريسه مش فاهمها دي

مشخبطاتي said...

سمكة واحدة..

ربنا يستجيب دعائكم .. قادر ياكريم !

موضوع الكوباية فعلاً أنا مؤمن به جداً .. لكن المشكلة إنه مافي كوباية إلى الآن !

نورتم الشخبطة والله :)
ـــــــــــــــــــــ

Zika..

بجد نورتنا ولو إنت موجود معايا دلوقتي كنت شفت خفر الشخبطة وضرب النار شغال ..

حلو موضوع البطيخة ! :)

موضوع مندوب هريسة دا ياسيدي إن في قريب مني مصنع(صغير) لتصنيع المواد اللازمة للحلويات مثل الهريسة وكانوا عاوزين واحد للترويج لمنتجهم..دا حتى الإسم كان ظريف جداً..لكني للأسف نسيته !!

تحياتي :)

زهرة(جنى)الاسلام said...

السلام عليكم
اخى لية الاحباط دةانشاء الله بكرة تفرج
خلى عندك امل فى الحياة

مشخبطاتي said...

زهرة الإسلام ..

وعليكم السلام والرحمة..

لا مافيش إحباط ولا حاجة..الأمل في ربنا كبييييير والحمد لله !

جزاكم الله خيراً !

still-searching said...

المشكلة انك مش محدد هدفك
عشان كده بتخبط زي ما كلنا بنخبط
مش عارفين عايزين ايه ولا رايحين لفين
الحل الوحيد اننا نقول يا رب
ربنا يهديلك الحال :)

انما ايه شغلانة مندوب الدعاية اللي ب 350 جنيه دي :D
وجايين على نفسهم والمواصلات عليهم كمان

Unknown said...

السلام عليكم
متقلقش يا استاذ مصطفي اعتقد ان اي شاب في بداية حياته لازم يواجه صعوبات ومافيهاش حاجة لما تبقي مندوب مبيعات لشركة أدوية
انا خالي كده ومبيعرضش مراهم ولا حبوب تخسيس وما شاءالله متجوز ومخلف وعنده سيارة كمان وطلع عمرة .
شكرا علي الشخبوطة دي

أبو مصعب said...

خبر ايه يا درش ما تهدى كده
فى البداية انت عندك غلطة
انت اللى المفروض تدور على شغلانة مش تستنى الشغل يجيلك لحد عندك
ده لاننا فى حكومة نظيفة
وبعدين اللى بيبدأ ضغير بكره يكبر
واللى مش عاوز يبدأ غير كبير مش هيبدأ

مشخبطاتي said...

لسه بدوّر..

هو أنا حاطط هدف عشوائي كده..واللي خلاه عشوائي إني مش ماشي في الوصول ليه كويس ..!!

يعني..عاوز أكون جيولوجي مؤهل للعمل في أي مكان خلال سنتين من تاريخه..وهذا يتطلب عدة دورات وتجارب..وهذه الدورات تحتاج إلى فلوووووووووووس..يعني لازم أشتغل ماهو مؤقت..!!


بس بصراحة..أنا مش مقتنع بالهدف..مش عارف ليه؟!


هو أنا ناقصني حاجة مهمة جداً...وهي التوجيه..يعني أسأل مجرب..مش موجودة عندي !

شكراً ع المرور وربنا يديم الزيارات :)

مشخبطاتي said...

مسلمة حرة..

شغلانة مندوب الأدوية دي انا كارهها جداً جداً...هو فعلاً في ناس بتنجح فيها وأنا عارف منهم ناس معرفة شخصية..لكن أنا حاولت ومش داخلة لي..!

وربنا يتقبل من خالكم إن شاء الله وييسر له الحال ..

نورتم الشخبطة.

مشخبطاتي said...

دكتورنا أبو مصعب..

ياعم دا أنا هادي ع الآخر..

على فكرة أنا عارف إن دي غلطتي..لكن بجد بجد والله انا ماعارف أعمل إيه(تحديداً) ..!

إدعي لي جامد..وعلى فكرة أنا مقتنع بموضوع الصغير والكبير دا جداً..وغن شاء الله قريب ح أبطل يوميات عاطل :)

لكن ماتنساش دعواتك..:)

راجية الرحمه said...

اولا عجبانى جدا كلمه - قابع -
ثانيا ابن خالتى ليسانس اداب قسم تاريخ
يعنى يشتغل مدرس ثانوى زى الفل
وطبعا مش لاقى شغل ف مدارس ولا حتى حضانه اشتغل فى كافتريا موظف حسابات واشتغل مندوب مصنع -اطباق صينى - و مفيش وظيفه تقريبا زاد فيها مرتبه عن ال 300 جنيه ايه يعنى لما يتعب شويه فى لاول ماهى ظروف بلدنا كدا ...
على فكره ابن خالتى دلوقت بقى مدرس فى مدرسه ثانوى اد الدنيا بس عيبه الوحيد حزب وطنى
من رأى ان حضرتك توافق على اى شغل كويس و مناسب و العمليه بتيجى واحده واحده

ربنا يزيح همك
ويفك كربك
واسفه على الاطاله

مشخبطاتي said...

راجية الرحمة..

هي فعلاً كده..وأنا خلاص ح أنزل أشتغل أي حاجة ومفيش في الشغل عيب..

شكراً جداً(جداً) على النصح..ودعواتكم..!

:)

غير معرف said...

أخى الكريم أكيد مش انت لوحدك اللى بتعانى من البطالة فى مصر لكن المفروض ان ده أمر واقع ولازم تتكيف معاه وتقبل أى وظيفة ولو بشكل مؤقت وياريت تبص للدنيا بنظره ايجابيه وتتفاؤل(تفائلوا بالخير تجدوه)
أكيد أحوارك راح تتحسن لكن لازم تعمل اللى عليكى والتوفيق والفرج من عند الله


أختك :متفائله

مشخبطاتي said...

الأخت متفائلة..

شكراً مروركم ونصيحتكم..الحمد لله بعد التدوينة والتعليقات عليها أصبحت من أكبر المتفائلين..
!!

بدأت أمسك خيوط..إن شاء الله ممكن أضعها امامكم في يوميات عاطل 3 !
:)

blogger templates | Make Money Online