مر عام على الشخبطة

السلام عليكم

مر على هذه المودنة عام+10 أيام

وبدون مقدمات ورغي ع الفاضي

ما رأيك في المدونة ومافيها..والعبد لله بيحب الصراحة جداً

فمن أراد ان يقول أن المدونة هي أفضل مدونة على الشبكة ومن وقت لآخر أدخل لأرى الجديد..بل إنني عندما أصبح ادخلها وقبل النوم وكذا قبل الأكل وبعده..فكأنني مريض والشخبطة هي الدواء..فمن قال ذلك فهو حر..!

آخر يقول: مدونة جيدة وبالتوفيق إن شاء الله..عادي برضه !

آخر غير الآخر التاني يقول: ياعم روح مدونة إيه وكلام فارغ إيه..انت بتصدق نفسك إنك مدون..ياعم روح إلعب مع بئوشة إبن حتتكم..قال مدونة قال..دا إنت أحسن لك تقفلها وتروح تدور على شغلانة تاكل منها عيش بدل ما إنت (قابع) في بيت أبوك الحج !

اللي  ح يقول كده برضه عادي أوي..!

فالمرء قليل بنفسه كثير بمن حوله...فأرجوا إبداء أرائكم ونصائحكم !

يوميات عاطل...2

سلامو عليكو

ومازلتُ قابعاً في بيت أبويا الحج ..!

أي والله لسه قابع..لاجديد في حياتي فأمسي مثل يومي وإن شاء الله بركه ح يبقى زي النهاردة..بس انا إحتمال أحلق شعري بكره !!

كل ما أتيح لي من شغل عبارة عن مندوب دعاية..الشغلانة دي متوفرة بالعبيط..!

أول مرة بعد التخرج على طول..وكنت طالع فرحان وبضحك للدنيا وبرسم في الأحلام..طلعت الدنيا كوابيس !!

المهم..أول شغلانة كانت عن طريق أبويا في شركة مستلزمات طبية يعني تجهيز مستشفيات وعيادات وكل الكلام ده..الراجل اللي كنت المفروض رايح عليه يعطيني موعد ويخلفه مرتين ورا بعض والموعد من لسانه فاتخنئت منه يعني من الآخر بيوزعني ..!!

بعد كده سكة الجيش..يعني مصر هي أمي وليبيا هي خالتي..والحمد لله أخدت التأجيل من الخدمة العسكرية وبصراحة العملية مش ناقصة أصلها مستكفية ع الآخر !!

واللي يشوفني وأنا فرحان يقول أنا ح أشتغل تاني يوم بالنهار وأروح أخطب العروسة باليل وأتجوز آخر الأسبوع..لكن بعد كده طلع الموضوع كبير (كبير أوي) وإن شاء الله أكلمكم عن موضوع الخطوبة والجواز بعدين :)

ثم جاءت الفرصة الثانية..برضه مندوب دعاية..بس المرة دي في شركة أدوية وبصراحة دي أكتر شغلانة أكرهها في حياتي بسبب زمايلي اللي اشتغلوا فيها وكان حالهم صعب جداً..ناهيك إنك ممكن تتدبس في مرهم او كريم تدليك او أدوية تخسيس وحاجات تانية في منتهى قلة الأدب..يعني تخيلوا معايا كده وأنا داخل ع الدكتور من دول وانا زي الحيطة كده ومعايا حبوب تخسيس..إخص الله يكسفك يامصطفى(اللي هو أنا) دا إذا دخلت للدكتور أصلاً..يعني يمكن بعد مايلطعك نص ساعة بره تطلع بلاجديد..لأ وإيه ممكن تطلع بعد شوية من كرامتك تضيع..وساعتها ياحلو تروح تبص في المراية ح تلاقي نصك مش موجود ..!!

فأنا احترت بينها وبين إني أنمي نفسي وآخد دورات وكل الجو دا علشان لما تيجي شغلان في مجالي أكون جاهز..وفعلاً بسبب كرهي وبغضي الشديد للشغلانة أخذت دورة ICDL وخلصت الدورة...!!

لكن في أثناء الدورة عرضت عليا أخرى..برضه مندوب دعاية..لكن المرة دي حاجة مختلفة خالص..كانت مندوب هريسة وجلاش ! وكانت بـ: 350 ج في الشهر طبعاً المواصلات عليهم...وطبعاً رفضتها لأن حسيت إني بينضحك عليا إزاي هريسة وحاجة حلوة و350 جنيه..إيه الحلاوة اللي موجودة في الموضوع ...!!

اما أنا دلوقتي فحالتي النفسية زي الزفت..وممكن تكون أزفت من الزفت بزفتين تلاتة !!

فكها من عندك يارب !

أنا لازم أفكها شوية

( قيم نفسك .. أنت والمزاح )*

س1: هل تحفظ كثيراً من النوادر والطرائف؟

أ. أنا بنك للنوادر والطرائف.

ب. أحفظ ولكن ليس كثيراً.

ج. نادراً ما أحفظ طرفة.

س2: كيف تستخدم هذه النوادر والطرائف؟

أ. أستخدمها بصورة عالية.

ب. أستخدمها بصورة متزنة.

ج. أستخدمها بصورة نادرة.

س3: إذا ألقى أحداً طرفة فما رد فعلك؟

أ. أضحك بصورة مذهلة ونخرج عن الموضوع ونقلبها مزاح.

ب. أبتسم ونعود إلى الموضوع الأصلي.

ج. لا أبدي أي رد فعل.

س4: إذا كان المقام مقام تنزه ومزاح فماذا تفعل؟

أ. لا أكف عن المزاح.

ب. أبدو مرحاً ومازحاً.

ج. أحرص على سمتي الطبيعي.

س5: إذا كان المقام لايحتمل المزاح فأين تجد نفسك؟

أ. لاتختلف عندي المواقف كثيراً.

ب. ألتزم بطبيعة الموقف.

ج. انهر بشدة من يخرج عن طبيعة الموقف.

ـــــــــــــــــــــــــــــــــــــــــــــــــــــــــــــــــــــــــــــــــــــــ

مفتاح الإستبيان:

إذا كانت أكثر الإجابات والخيارات لــ:

(أ): فأنت تمزح بلا ضابط وتحتاج شيئ من الإعتدال والتوازن.

(ب): فأنت شخص معتدل ومتزن وتتقن فن المزاح.

(ج): فأنت تحتاج لأن [تفكها شوية] وتأخذ [شوية] من أخينا في النموذج الأول.

طبعاً..لما عملت الإستبيان على نفسي كانت إجاباتي الملونة باللون الأزرق...وانا كده محتاج أفكها شوية فلو حد جاوب وطلع النموذج الأول أمانة عليه أو عليها آخد منه أو منها شوية ونستنفع إحنا الإتنين :)

**********************

*من كتاب:

كيف تكسب حب الناس في أقل من دقيقة.. للأستاذ عاطف أبوالعبد..مدير مركز جنا للتدريب والتطوير الإداري والتربوي