الثلاثاء، مارس 02، 2010

تدوينة رخمة جداً


هاي ياجماعة..عاملين إزاي
يارب تكونوا كلكم كلكم حلوين آخر حاجة..أي والله العظيم آخر حاجة
المهم بئي علشان الوقت من دهب لو أنا ما أتعشتش بيه هو أبن لذين ح يتغدى بيا دا انا عارفه شَرِه ونفسه مفتوحة للناس الكوول اللي زيي..(صورة عيل روش ومايص بيضحك)

إمبارح انا صحيت من النوم الفجر..حد مصدق دي..بس بجد بجد الكلام دا كان واقع وماكنش واقف(نفس صورة العيل إياه)

بس أنا ماكنتش صاحي كده جدعنة يعني لا لا مانتوا عارفني من يومي مايص وماليش في أمور الجدعنة..بس أنا كنت صاحي علشان عندي مشوار في القاهرة..وحصلت لي حاجات كتير أوي أوي ونفس الوقت رهييييييييبة خالص..فقلت لازم أحكي لكم انا علمت إيه علشان تستفادوا من تجربتي...!

اول ماصحيت أكلت..ودي اول مرة آكل من زمان اول ما أصحى وبصراحة بصراحة أنا إكتشفت حاجة حلوة خالص وأنا بـ eat إمبارح..عارفين إيه هيا؟!

لأ...مش ح قول..إتحايلوا عليا شوية..وقولوا بليز بليز بليز كمل..واضح إنها حكاية مثيرة أوي أوي (يااااي) (نفس صورة العيل الروش)

أنا إكتشفت إن أحلى حاجة في الدنيا دي كلها على بعضها إنك تآكل (eat يعني ) وبعد كده تنام ولما تصحى تاكل كمان مرة..ياااااه إحساس فظييييييع (إتكى على حرف الظه شوية)

المهم بعد ما أكلت لبست ولمعت الشوز واخت المصروف من دادي (كان أبويا الحج في التدوينة اللي فاتت..لاحظوا الفرق) ونزلت الشارع ومشيت وسط الناس الفلاحين الغلابة وطول ما انا ماشي كنت بوزع في سلامات ليهم..غلابة بئى وأنا قلبي أبيض من لون فانلة الأهلي(الجوانية طبعاً) وطول ما أنا ماشي:

هاي طنط سعدة..جود مورنينج طنط صالحية..بنجور طنط مستكة
وأشور بصوابعي في حركات تبادلية لأونكل الدمراني عسكرية وعمو توفيق بتلو سفاح حتتنا اللي هو الجزار عندكم..!

ولما وصلت المحطة أخت توك توك وكان إحساس جميل لأني بحب الكتكوت دا موووووووووووت..ولأني دايماً إنسان صالح زي ما انتو واخدين بالكم..لئيت عربية رايحة على طول القاهرة والمكان اللي أن رايحه كمان..!

وركبت العربية..وكانت من الجديدة اللي هي 2009 أم سقف عالي وقعدت مع ناس عاديين كتير خالص..
********
******
****
**
ويستمر هذا المسلسل الرخم جداً من الكلمات..مما يطرح تساؤلات عدة..لماذا ندون؟!
بالفعل وجدت مثل هذا الأسلوب الكثير والكثير في المدونات والمنتديات...تفاهات وأطروحات ليس لها أي علاقة بالواقع..شاب أو فتاة يكتب انه صحي وراح عند قرايبه....إلخ

فالسؤال الموجه إلى المارين من هنا..لماذا تدون..وماهو التدوين بالنسبة لك؟
ثم كيف تستخدم النت..وكيف تجعله مفيداً لك؟

18 Comments:

still-searching said...

تصدق تدوينة حلوة جدا :)

في ناس لاقت التدوين موضة قامت مشيت مع الموضة وطلعت الحاجات اللي بتقول عليها دي

لكن في ناس تانية وجدت ان فيه موهبة جواها في الكتابة والتدوين
فقالت تنميها من خلال المدونات
ووجدت فيها وسيلة لنشر أفكارها وتبادلها مع الآخرين ورؤية آراء الآخرين

وبكده تكون منفعة متبادلة وعامة

أفدتنا من المدونة اللي مش رخمة جدا دي :)

موناليزا said...

ياسلام
أخيرا لقيت السؤال اللى نفسى اسمع اجابته من الكثير
عموما سأنتظر معكم معرفة الاجابات

مشخبطاتي said...

لسه بدوّر..

جميل جداً كلامكم..وأنا خمنت الإجابة من كلامكم .. :)

ـــــ

موناليزا..

أي خدمة..حققنا لكم ماتريدون

يلا..إحنا الشخبطة..إحنا اللي بنحقق للناس أحلامها واللي نفك فيه قرب قرب قرب.. :)

ننتظر معكم :)

زهرة(جنى)الاسلام said...

السلام عليكم
صراحتا اخى وانا بشوفها بجد اتعصبت
متزعلش
بس فى الاخر لما فهمت مغزاها
لقيتها حلوة جدا
وبالنسبة للسؤال
انا يوم لما فكرت ادون قررتى جوا نفسى شئ مهم
وهو انى اعمل المدونة دى لتحرير الاقصى
وهو دة هدفى وحلمى ومازال مستمر

مشخبطاتي said...

زهرةُ الإسلام..

وعليكم السلام والرحمة..

يسر الله لكم طرق الوصول لهدفكم..لكن أحسنواالتخطيط له والأهداف الكبيرة دائماً تحتاج للجهود الجماعية..

وفقكم المولى..وتحياتي.

Tamer Nabil Moussa said...

التدوين دة تقدر تقول علية منفث وطريق بلاسدود يقدر كل واحد يكتب اللى هو عايز يكتبة وبطريقتة الخاصة مش شرط اكون كاتب محترف يكفى ان اكون اعرف الكتابة لكى ارسم حروفى على المدونة كما اشاء

ولكى يراها الاخرون وارى ما يكتبة الاخرون


مع خالص تحياتى

غير معرف said...

على فكرة بقى تدوينة جميلة جدا
اقولك انا بقى انا كنت بدون ليه
كان فى حاجات انا شايف انها غلط وبحاول اصلحها
لكن اذا كنت باستخدم الاسلوب الساخر ساعات ده لانى انا شخصيا بمل من المواضيع الصلبة اللى كلها كلام ودش
يعنى مافيهاش اكشن يعنى
لكن ياخسارة لسه حتى الان بناقش قرار الاعتزال
ابو مصعب طبيب اطفال

راجية الرحمه said...

شوفت النموذج اللى حضرتك قولته ده فى التليفزيون على صفحات النت وبيكون الغرض هو نقد الشخصيه لكن بأمانه مشوفتش الشخصيه دى فى الواقع اظاهر كدا والله اعلم انى معرفش غير - الناس العاديين خالص -

مشخبطاتي said...

المدون تامر نبيل..

الشخبطة منورة والله العظيم.. :)

تقريباً متفق معكم في معظم ماقلتم !

مشخبطاتي said...

طيب ليه كده يادكتور..

ماتدخل من معرفك ياحج..طيب نبعد عن التدوينة وح أقولك حاجة..

لما عملت المدونة بعد شوية قررت إن أقفلها ورجعت في كلامي تاني..وشوية كده وشوية كده وفي الآخر قلت لنفسي..ياواد يادرش انت مش ح تخسر حاجة بالعكس أنت ح تقل رأيك وتتبادل الأراء مع ناس كتير كل له طريقة في التفكير وإهتمامات متغايرة..


وحددت أهداف تانية خاصة والحمد لله إلى الآن الأمور تسير بشئ مما كنت أريده..!

يادكتور لما مدونة محترمة تتقفل..ايه اللي ح يبقى مفتوح؟!

ارجع عن اللي في دماغك يادكتور :)

مشخبطاتي said...

المدونة/ راجيةُ الرحمة..

فعلاً النموذج لم أقابله كهيئته..الشكر للإعلام التعبان بتاعنا..فنصف هذا النموذج قد يكون متواجداً...ولأننا دائماً مانسخر من الواقع فظهر هذا المثال واشتهر جداً رغم أني لم أقابله..إلا ان صورته منطبعة في ذهني وأعتقد في أذهان الكثير !!

لكن ماذا يعني التدوين لكم؟!


تحياتي.

طلباوي said...

السلام عليكم ورحمة الله وبركاته أنا أول زيارة ليه في مدوتك الرائعة
وبجد أن إتزهلت لما قريت العنوان
بس بعد ما قرأت الموضوع لأيته جميل جداً
ومتحرمناش من حجاتك الحلوة دي دايماً

مشخبطاتي said...

سيدي فلسطيني..

وعليكم السلام والرحمة..عطرت حروف اسمكم أرجاء المكان وفاح عطرها..وشكراً على المجاملة الظريفة :)


ممكن نتعلم حاجات من التدوينة..إننا لا نحكم على الأشياء من النظرة الأولى ولا إيه؟!

:)

♥ ♥ Amira Samy ♥ ♥ said...

المدونة جميلة و الشخبطة دى حلوة أوى
الصراحة أنا مش عرفة أنا عملت مدونة لية ممكن لأنها كانت واجب فى أأأأأأأأأحد الدورات بتاعت النت بس حفكرلها فى سبب مقنع بس بجد جميلة
تقبل مرورى

أبو مصعب said...

اولا انا فعلا رجعت عنه
ثانيا السبب بس ان انا كنت هتلقى خمسين كدمه من خمسين اخ فى يوم واحد وكان سؤالهم اللى الكل بيساله انت قلت عنى ايه "ياد"
وده بعد تحليل الدفعة
تخيل بقى انك فى وسط راى عام كله ضدك فعشان اخرج من الموقف قلتلهم هبطل تدوين وكتبت التدوينة انما انا مقدرش ابطل تدوين
اما عن وجودى غير معرف فلانى كنت فى السيبر وخفت على الحساب لا انسى اقفله وده طبعا لانى كنت فى القاهرة والكل مستنى خبر الاعتزال والا هكون فى موقف وحش لان الدفعة بحالها عاوزانى حيا او ميتا
وربنا يكرمه د/أ.ا المسئول بتاعنا هو اللى طلعنى منهم وشجعنى وقال لى كمل
ومعلش طولت
لكن من الشجاعة ان تجبن ساعة

تحياتى

مشخبطاتي said...

سلسبيل..


أنرتمونا بمروركم العطر أختنا ..!!

وصدقاً وخذوها مني..الشيئ الذي له هدف أجمل بكثير جداً من الشيئ العشوائي..حددوا هدف من المدونة واعملوا على تحقيقه..وستلمسون التغيير !
:)

تحياتي.

مشخبطاتي said...

أبو الدكاترة..منور ياعمي :)

أيوه كدا هو دا الكلام..قال ح أقفل وأروح قال !


والحمد لله إن ربنا عداك من الدكاترة على خير..بس واضح إنك سياسي بجد وكمان ليك في الإعلام (صورة واحد بيغمز) !

أبو مصعب said...

ههههههههههههههههههه
"صورة واحد بيضحك"

blogger templates | Make Money Online